Para os efectos previstos no artigo 21.1 da Lei 8/2013, do 28 de xuño, de estradas de Galicia, sométese ao trámite de información pública o documento do Plan de seguridade viaria de Galicia 2016-2020: MSV no entorno de TCA na estrada PO-549, p.q. 8+000 a 9+800, de clave PO/17/143.06. O ámbito de actuación sitúase entre os p.q. 8+000-9+400 na estrada PO-549 (Vilagarcía de Arousa (PO-301)- Cambados (VG-4.3), nos concellos de Vilanova de Arousa e Cambados.

Este proxecto ten por obxecto definir, xustificar e valorar as obras necesarias para levar a cabo unha serie de actuacións que permitan evitar ou mitigar a accidentalidade que se vén producindo nos últimos anos no treito considerado.

As obras previstas comprenden as seguintes actuacións:

– Mellora das interseccións máis importantes do treito de estudo e principalmente naquelas en que se teñan producido accidentes.

– Restrición ou delimitación de prazas de aparcadoiro nas proximidades de interseccións e/ou accesos.

– Mellora de seguridade viaria nas paradas de bus e pasos de peóns.

– Mellora da sinalización e balizamento.

Considerando todo o exposto e o establecido na normativa vixente,

RESOLVO:

Primeiro. De acordo co establecido no artigo 21.1 da Lei 8/2013, do 28 de xuño, de estradas de Galicia, o proxecto de construción sométese ao trámite de información pública, durante un período de trinta días hábiles, contados a partir do seguinte ao da publicación deste anuncio no Diario Oficial de Galicia, para que as persoas que o consideren oportuno poidan formular por escrito, ante a Axencia Galega de Infraestruturas, as observacións que crean convenientes relativas á concepción global do trazado deseñado.

Segundo. Que, simultaneamente ao trámite sinalado no parágrafo anterior e para os efectos previstos no artigo 56.1 do Regulamento de expropiación forzosa, se someta a información pública a relación individual de bens, dereitos e propietarios afectados pola realización da obra correspondente, para que os afectados presenten cantas alegacións ou rectificacións consideren convenientes en canto aos bens e dereitos descritos na relación anexa.

Terceiro. A exposición ao público, para os efectos da presente resolución, realízase na Axencia Galega de Infraestruturas (San Caetano, s/n, 15781 Santiago de Compostela), no Servizo de Infraestruturas de Pontevedra (r/ Fernández Ladreda, 43, 1º-4º, 36071 Pontevedra), e na Casa do Concello de Vilanova de Arousa (pza. do Concello, 1, 36320 Vilanova de Arousa, Pontevedra), e na Casa do Concello de Cambados (pza. do Concello, 1, 36630 Cambados, Pontevedra). Así mesmo, na páxina web da Consellería de Infraestruturas e Vivenda (http://civ.xunta.gal/organizacion/c/CIV_Axencia_Galega_de_Infraestruturas), atópase á disposición dos interesados o documento completo do proxecto de construción.

Santiago de Compostela, 29 de novembro de 2017

Francisco Menéndez Iglesias
Director da Axencia Galega de Infraestruturas

ANEXO
RELACIÓN DE BENS, DEREITOS E PROPIETARIOS AFECTADOS
CLAVE: PO/17/143.06

Concello de Vilanova de Arousa.

Concello de Cambados.